Það er ýmislegt búið að gerast síðan síðasta færsla var skrifuð. 

Jæja, nú er orðið langt síðan ég hef hripað eitthvað hérna, ákvað að bæta úr því :)

ATHUGIÐ MYNDIR FRÁ JANÚAR MÁ FINNA HÉR

Það er nú ansi langt síðan það var bloggað

Desember flaug áfram eins og við er að búast. Tumi á fullu að sinna sínu námi og Arndís að vinna. Upp úr miðjum mánuðnum byrjaði að snjóa og hefur verið hvít jörð síðan. Danir eru alveg að missa sig yfir öllum þessum snjó og það er alveg greinilegt að þeir hafi ekki fengið neina kennslu í snjóakstri, 20 mín ferðalag í bíl tekur núna klukkustund eða jafnvel lengur.
Við flugum svo heim að kvöldi 22.des, vegna "worse weather conditions in Denmark and other parts of Europe" (þetta gjall í hátalarakerfi flugvallarins á þriggja mínútna fresti... engar ýkjur hér á ferð, ég tók tímann!!) seinkaði fluginu okkar um 1 eða 2 tíma. Við komum okkur vel fyrir í quiet area á flugvellinum þar sem að eru hægindastólar og þráðlaust netsvæði. Með þessu móti fundum við ekki fyrir seinkuninni:)

Við lentum loks á Íslandi um kl.02 þann 23.des. Við fengum graflax með öllu tilheyrandi þarna um nóttina, fórum í jólaklippingu til Berglindar um morguninn, fórum svo að kíkja í heimsóknir og stússast þetta síðasta jóla jóla. Fórum í friðargöngu um kvöldið og enduðum svo á að pakka inn öllum jólagjöfunum.

Jóladagarnir voru hefðbundnir, matarboð, matarboð og fleiri matarboð, þar sem étið var á sig gat :P það þarf nú ekki að hafa fleiri orð um það.

Þann 28.des ákváðum við svo að tími væri kominn til að skella sér í flugeldasölu hjá Björgunarsveitinni Ársæli, þar eyddum þónokkrum klukkutímum í að pranga púðri inná fólk (28., 30., og 31.des fóru í þessa skemmtilegu iðju) :) Bjsv. Ársæll þakkaði okkur fyrir hjálpina með því að senda okkur inn í gamlárskvöldið með pakkaðan bíl af púðri, ekki leiðinlegt það.

Nýja árið hélt áfram með matarboðum:) allt þar til að við héldum af landi brott síðasta jóladag 6.janúar.

Þegar við mættum aftur á Gammelmosevej var búið að hengja klósettpappír fyrir útidyrahurðina okkar þar með áletrun sem bauð okkur velkomin heim:) Það hef enn enginn lýst gjörningnum á hendur sér en þetta olli breiðu brosi hjá okkur:))) Íbúðin tók svo á móti okkur eins og við skildum við hana, fyrir utan að hún var örlítið kaldari en í minningunni... enda bara 18°c þar inni. Því skrúfuðum við upp hitann á ofnunum og tókum upp úr töskunum til að halda á okkur hita.

Arndís byrjaði svo að vinna tveimur dögum seinna og Tumi fór að undirbúa mastersverkefnið.

Það er búið að vera mikil umræða um samdrátt í heilbrigðiskerfinu hérna úti og varð vinnustaður Arndísar ekki útundan þar. Um miðjan janúar var 200 manns sagt upp störfum á sjúkrahúsinu í Herlev. Arndís slapp og í stað þess að vera beðin um að minnka við sig vinnuna var henni boðið að hækka í starfshlutfalli og taka fastar næturvaktir. Hún mun því vinna 7 næturvaktir í röð og er svo 7 daga í fríi (vegna næturálags kemur þetta út eins og fullt starf). Fyrsta törnin er búin og gekk hún ágætlega fyrir sig, en fríið inn á milli er alveg dásamlegt:)

Tumi er byrjaður á verkefninu sínu, fór hann til Odense í einn dag til að læra að forrita ljósaflísarnar sem hann verður að vinna með. Síðan er hann að þreifa sig áfram með þetta. Hann hitti leiðbeinandann sinn í gær sem varð alveg hissa þegar hann sá hvað drengurinn var kominn langt áleiðis með verkefnið :)

Síðasta vika hefur svo snúist um handbolta og meiri handbolta eins og hjá svo mörgum. Vonumst við eftir góðum leik hjá íslenska liðinu í dag á móti því franska.

Hafðu það gott í veðurblíðunni á Íslandi eða hvar sem þú lesandi góður ert staddur.
Við sendum okkar bestu snjókveðjur frá "Ís"mörkinni.

Þar til næst,
A&T

Jæja, nú fer að verða liðinn mánuður síðan síðast var bloggað, svo að ég ákvað að gera eitthvað í þessu...

Vá hvað þessi vika er búin að vera skemmtileg og fljót að líða!

Síðasta sunnudag kom félagi Tuma til okkar, hann fékk að nýta svefnsófann í þrjár nætur. Hann fær tilnefninguna: Fyrirferðarminnsti gesturinn :) það fór svo lítið fyrir honum.

Á mánudaginn fórum við á tónleika með MUSE, þetta voru rosalega flottir tónleikar! Það ringdi mjög mikið á okkur á leið okkar til Parken þar sem tónleikarnir voru haldnir, ég var reyndar með regnhlíf en Tumi vildi frekar rigna niður... honum sló næstum niður í leiðinni. Þegar inn í Parken var komið voru ekkert nema Íslendingar í kringum okkur, fyrir ofan, neðan og til beggja hliða - ótrúlegt.

Þriðjudagurinn fór í að vinna og miðvikudagurinn fór í að hitta á þrjár íslenskar stelpur sem útskrifuðust með mér úr hjúkrunarfræðinni heima, það er alltaf gaman að hittast og slúðra:). Rétt áður en ég var að leggja af stað heim eftir hittinginn þá hringdi pabbi í mig og sagðist vera kominn á Kaupmannahafnar-Strikið eftir að hafa verið á flækingi annars staðar í DK. Ég fór því að hitta hann og félaga hans. Tumi var svo sætur að kaupa góðan mat handa okkur og elda á meðan við reyndum að koma okkur heim á bílaleigubíl sem var án staðsetningartækis... mér fannst það frekar erfitt þar sem að ég tek alltaf lestina heim og rataði ekkert í myrkrinu. Til mikillar mildi var ég með GPS tæki í símanum sem kom okkur á leiðarenda að lokum.

Ég er svo að fara á næturvakt í nótt, síðan ætla ég að sofa eins lengi og ég get, koma mér í rífandi stemmningu, fara svo í bæinn með Tuma og nágrönnum okkar og taka á móti jólabjórnum og skemmta okkur eins lengi og við nennum:)
Laugardagurinn fer svo í mjög svo ameríska hefð... Halloween. En flestallir íbúar hússins ætla að mæta og skemmta sér saman í furðulegum búningum. Það ríkir mikil leynd yfir búningunum þetta árið og því get ég ekki sagt ykkur hvernig við Tumi ætlum okkur að vera... en kannski maður setji inn myndir eftir helgina.

Til að fylla upp í tómar stundir á daginn prjóna ég. Í vinnslu er lopapeysa á pabba, ég er búin að festa ermarnar á og er byrjuð á axlarstykkinu (mynstrinu), peysan ætti því með þessu áframhaldi að klárast vel fyrir jólin.

Svo ég segi ykkur líka fréttir af Tuma, þá er hann á fullu að leita eftir mastersverkefni. Hann er búinn að fara á fund með manni sem er yfir Playware-deildinni í skólanum og leyst vel á það sem er í boði þar. En eigum við ekki bara að pressa á hann að koma með næstu bloggfærslu með frekari skólafréttum ;)